Carru de centollu

A la hora de comer un centollu, nÁsturies, ye costume enraigoñada'l reservar el carru d'esti (llámase-y carru al caparazón del centollu xuntu con tolo que tien dientru) pa comelu col amestu que darréu se desplica.

¿Qué fai falta...?

-El carru d'un centollu.
-Sidra
-Un güevo cocíu.


¿Cómu se fai...?

Tien d'abrise'l carru pa dempués saca-y tola carne posible, y cha-ylo dientru xuntu col güevu picáu y un chorrín de sidra.

Chorizos a la sidra

¿Qué fai falta...?
(Ingredientes pa cuatru persones)
-Cuatru chorizos.
-Media botella de sidra.
-Media fueya de lloréu.


¿Cómu se fai...?

Los chorizos nun tienen de tar curaos. La receta, amás de pervieya ye percenciella.

Pónense a cocer los chorizos na sidra acompangaos de la fueya de lloréu.

Al rodiu de los quince o venti minutos sacámoslos de la pota, partímoslos en rodaxines y presentámoslos calentinos y si ye posible, nuna cazuelina de barru con daqué del caldu de cocelos.

Güevos duros

Nun hai espicha nin tertulia sidrera que se precie na que nun tean presentes los güevos duros acompangaos a ca bocáu de sal y pimentón picante. Dicen los entendíos na materia que los güevos duros son perbonos pa con sidra porque amenorquen los efeutos etílicos de la mesma.
Oricios

Tamién nomaos arcinos na fastera oriental del país. Suelen tomase cocíos, anque los mariscadores caltienen que comu meyor saben ye crudos. Son un braeru bocáu de tastu a mar y combinaos con bona sidra faen un conxuntu increyible. La so xinta dempués de coyelos nel pedreru conviértese, les más de les vegaes nun auténticu ritual d'asturianía.

Güevares de merluza

Braeres delicies que puen presentase cocíes con una vinagreta o rebozaes. Si bien nun tienen munchu valor comercial los mariñanos del país saben dar bona cuenta d'elles ente culete y culete.

Escalopinos de xata a la sidra

¿Qué fai falta...?
(Ingredientes pa cuatru presones)
-Una docena d'escalopinos de xata.
-Un culín d'auguardiente de sidra.
-1/2 botella de sidra.
-250 cl. de ñata llíquido.
-Puré de pataca

¿Cómu se fai...?

Dempués de salpimentar los escalopinos frirémoslos n'aceite caliente. Nel xugu de frir la carne flambiaremos col culín d'auguardiente de sidra pa dempués char la sidra afayadizo.

A la fin amestaremos la ñata llíquido, iguaremos de sal y pimenta la salsia y dexaremos menguar ésta daqué.

A la hora sirvir charemos la salsia perriba los escalopinos, acompangando'l platu d'un puré de pataca fecho anantia.

Esnales de pitu a la sidra

¿Qué fai falta...?
(Ingredientes pa cuatru presones)
-Dos docenes d'esnales de pitu.
-Una cebolla grande.
-Dos serugues d'ayu.
-1/2 botella de sidra.
-Caldu de pitu o augua.


¿Cómu se fai...?

Enfariñamos les esnales y frímosles n'aceite percaliente. N'otra pota sofreyirermos les verdories, dempués chámos-yos enriba les esnales y tapecémosles cola sidra y daqué de caldu o nel so defeutu d'augua.

Cocinales fasta qu'adiquemos que tán tienres abondu.

Fritos de sidra

¿Qué fai falta...?

- Una botella de sidra.
-300 grs de zucre.
-Unes pingarates d'auguardiente de sidra.
-250 cl. de lleche.
-200 grs de Maizena.
-Tres yemes de güevu.
-Pan rallao y güevu batío



¿Cómu se fai...?

Nuna pota fiérvese la sidra aromatizáo col auguardiente y endulzao col zucre. Nuna cacipla aparte améstase en frío la lleche cola Maizena y coles yemes de güevu, y cuandu la sidra entame a ferver chase-y l'amestu y déxase que torne a ferver un cachu fasta qu'adiquemos qu'entesta abondo.

Nuna bandexa o recipiente daqué pandu charemos la pastia fasta qu'enfríe, y dempués curtiarémosla en cachos d'al rodiu de los dos por dos cms, qu'empanaremos col pan rallao y el güevu batío pa dempués frilos a fueu fuerte.

Una vegada fritos presentarémoslos comu más mos pete, acompangaos d'una compota, solos, con ñata montao...

Mazanes a la sidra

¿Qué fai falta...?
(Ingredientes pa cuatru persones)

- Cuatru mazanes (preferiblemente que nun seyan de tipu Golden).
-Una botella de sidra.
-300 grs de zucre.
-Ñata montao pa orniar.


¿Cómu se fai...?

Pulgaremos les mazanes curiando de nun quitáyos el rabu, pa dempués coceles na sidra col zucre a fueu non demasiadamente fuerte pa que nun se mos desfaigan.

Presentarémosles preferiblemente nuna copa orniaes con ñata montao y bañaes con daqué del xugu de coceles.

Pataques a l'asturiana

Incluyimos esta receta que s'ufierta en recetarios asgaya, solu qu'en dengún de los que s'atopó fasta agora apaecía fecha con sidra y auguardiente de sidra, sinon con brandy y vinu blancu.
¿Qué fai falta...?
(Ingredientes pa cuatru persones)

-Un kilu pataques.
-Una cebolla.
-Una cenadoria.
-Dos chorizos.
-Un vasu sidra. -100 grs. de xamón.
-Un pimientu.
-Una seruga d'ayu.
-100 grs. de arbeyos.


¿Cómu se fai...?

Pásense pel cazu la cebolla, la cenadoria, el pimientu y l'ayu, too bien picaino, con un poco d'aceite.
Dempués améstase'l chorizu trociáu, el xamón y los arbeyos. Una vegada repiñáu esi fondu échense les pataques trociaes en cachos non mui pequeños a fueu fuerte. Flambiase col auguardiente de sidra, y cúbrese con caldu y daqué de sidra. Too ello cuezse fasta que les pataques tean tienres, ximielgando ca poco la tartera pa qu'engorde'l caldu.

Picatostes a la sidra

¿Qué fai falta...?
(Ingredientes pa cuatru persones)

-Cuatru rodaxes de pan duru.
-Lleche.
-Güevu batio.
-Sidra.
-Zucre.

¿Cómu se fai...?

Pónse'l pan a remoyu na lleche frío demientres un par d'hores, pa dempués remoyalo en güevu y frilo en bastante aceite.

Caberamente remuéyense con almibre fechu con sidra y zucre.

Salsia cenciella de sidra

Trátase cenciellamente de un mengüe de sidra enriba d'un sofritu d'ayu y cebolla flambiáo con auguardiente de sidra. Esta salsia va valimos pa milenta platos.


Salsia mariñana de sidra

Nun fondu d'ayu, guindilla perrexil saltiao flambiamos con auguardiente y chamos un bon chorru de sidra dexando menguar.

A lo cabero amestamos a la salsia un poco de caldu de pexe, tornamos a dexar menguar y retificamos de sal. Ye una salsia perbona pa tresnar pexe xunto cola que vien darréu.

Salsia de sidra

Enriba d'un saltiáu d'ayu y cebolla chamos tomate triturao, flambiamos con auguardiente amestamos la sidra y rematamos con daqué caldu de pexe. Dexamos menguar ya iguamos de sal.

Tanto esta salsia comu la d'enantes tamién puen espesase si peta con un poquiñín de fariña trigu o Maizena.

Xamón frescu de gochu a la mariñana de sidra

¿Qué fai falta...?
(Ingredientes pa cuatru persones)
-Ochu filetinos de xamón frescu.
-Una docena d'amasueles.
-Ayu, perrexil y guindilla.
-Un poco fariña.
-Auguardiente de sidra
-Caldu de pescáu.
-Sidra.


¿Cómu se fai...?

Friremos a fueu fuerte los filetinos, a los qu'amestaremos les amasueles. Aparte faldremos la salsia mariñana comu vien darréu.

Nun fondu d'ayu, perrexil y guindilla saltiao flambiamos con auguardiente y chamos la sidra pa dempués dexalo menguar. Amestamos un pocu de caldu de pexe y dexamos menguar otra vuelta, chando un pocu fariña.

A lo cabero cubriremos cola salsia mariñana los filetes.

Xáragu a la sidra

¿Qué fai falta...?
(Ingredientes pa dos persones)
-Un xáragu d'al rodiu'l kilu.
-Una cebolla grande.
-Tres serugues d'ayu.
-Un pimientu.
-Perrexil.
-Un vasu de sidra.



¿Cómu se fai...?

Sofrir la cebolla xunto col ayu, el perrexil y el pimientu picaos. Una vegada que tean bien pasaes estes verdories charemos un vasu sidra y dexaremos esti amestu menguar daqué.

Per otru llau nuna fonte de fornu ponse'l xáragu, anantia saláu, y cúbrese cola salsia una vegada que tea pasada pol pasaor.

Métese en fornu xuntu con unes pataquines en rodaxes al rodiu de los venti o trenta minutos y sácase llistu pa sirvir.